Xerome de San Félix, o trinitario de Baltar que foi bispo de Albarracín

Jerónimo Fernández de Castro Delgado, coñecido como Jerónimo de San Félix, naceu en Baltar en 1758 e morreu en Albarracín (Teruel) o 5 de outubro de 1828. Foi trinitario descalzo, ministro xeral da orde, bispo e benefactor ^[1].

Vida

Tomou o hábito en Alfaro (A Rioxa) en 1773, estudou Filosofía en Pamplona e Teoloxía en Salamanca, e logo ensinou Filosofía en Miranda (Portugal) e Zaragoza e Teoloxía en Salamanca (tres anos como pasante e seis como lector). Foi ministro (superior) do colexio de Salamanca e do convento de Correxais, en Valdeorras, definidor xeral (1814-1818) e ministro xeral da Orde da Santísima Trinidade (1818-1824) ^[1].

Debeuse ao seu «infatigable celo» a beatificación, en 1819, por Pío VII, do reformador trinitario san Xoán Bautista da Concepción. No Trienio Liberal (1820-1823) fixo o imposible para que os rexulares non quedasen suxeitos aos bispos, pero sen resultado, e sufriu pola situación do seu irmán Pablo Fernández de Castro, cóengo de Santiago, encarcerado inxustamente en Madrid, a quen visitaba a diario ^[1].

Bispo de Albarracín

Nomeado bispo de Albarracín a comezos de 1824, tomou posesión o 2 de maio. Traballou polos fregueses con conversas privadas e cartas circulares aos seus sacerdotes, e gastou as rendas en atender pobres, orfos, viúvas e enfermos. Foi elixido bispo de Málaga, pero renunciou. Despois dunha longa e penosa enfermidade de oito meses, morreu en Albarracín aos setenta anos e con cincuenta e cinco de hábito ^[1].

Ligazóns

• Parroquia: Baltar
• Persoeiros da Limia
• Baltar
• Historia da Limia

Fontes

1. Bonifacio Porres Alonso, «Jerónimo de San Félix», Diccionario Biográfico electrónico da Real Academia de la Historia, reproducido en Historia de Xinzo, 16/06/2023. https://historiadexinzo.wordpress.com/2023/06/16/jeronimo-fernandez-de-castro-delgado-jeronimo-de-san-felix-baltar-orense-1758-albarracin-teruel-5-10-1828-ministro-general-obispo-trinitario-descalzo-orden-de-la-s/