A plataforma Stop Eólicos A Limia, Xurés e Celanova iniciou unha campaña de información e recollida de alegacións contra a instalación de aeroxeradores de 220 metros de altura na zona de Coto Novelle, entre os concellos de Cartelle e Castrelo de Miño.
A campaña comezará o xoves 26 de decembro cunha mesa informativa no mercado semanal de Celanova, localidade que, segundo lembran, en 2021 foi epicentro da primeira oposición veciñal contra proxectos eólicos na zona. As mesas informativas repetiránse nas feiras de Castrelo de Miño o 29 de decembro, Cartelle o 4 de xaneiro e Ribadavia o 10 de xaneiro. Nestes puntos, ademais de explicar a situación aos veciños, recolle-ránse sinaturas e alegacións contra o proxecto P.E. Arnoia. A plataforma preparou un modelo de alegación baseado no elaborado pola asociación Petón do Lobo, xa utilizado en outras campañas.
Stop Eólicos habilitou 12 puntos de recollida de sinaturas e alegacións en localidades como Ourense, Celanova, Xinzo de Limia, Bande, Allariz, Ribadavia e O Carballiño, así como en Cartelle, Outomuro e Vilar de Santos. A localización destes puntos pode consultarse nas redes sociais e na web da plataforma.
Impacto na saúde e o medio ambiente
A plataforma organiza visitas ás zonas afectadas. Nunha recente visita a Calvelos, aldea de Cartelle a un quilómetro do lugar previsto para a instalación dos aeroxeradores, informouse sobre os posibles riscos para a saúde, como o ruído (audible e inaudible) e as sombras proxectadas. Alertouse tamén sobre o impacto potencial nas fontes de auga que abastecen Calvelos e outras aldeas próximas, que poderían sufrir escaseza ou contaminación se o proxecto se executa. O prazo para presentar alegacións finaliza o 16 de xaneiro.
Archivado en: Ourense cidade, Ribadavia, Castrelo de Miño, Comarca da Limia, Cartelle
