Activación do Plan de Emerxencia por Inundacións en Xinzo de Limia

Xinzo de Limia, 3 de febreiro de 2026. Ante a grave situación provocada polas intensas chuvias e o desbordamento de ríos, o alcalde de Xinzo de Limia, Amador Díaz, activou oficialmente o “Plan de actuación municipal fronte ao risco de inundacións en Xinzo de Limia”.

Esta medida implica a posta en marcha dun Posto de Mando Avanzado (PMA), liderado polo propio alcalde, para coordinar os efectivos da Policía Local e Protección Civil e xestionar a emerxencia de xeito centralizado. O obxectivo principal é garantir a seguridade da veciñanza fronte a este episodio meteorolóxico.

Coordinación Interadministrativa

O Concello de Xinzo de Limia está en comunicación constante con diversas administracións para abordar a magnitude das incidencias:

• Consellería de Educación (información sobre centros de ensino)
• Confederación Hidrográfica do Miño-Sil
• Delegación do Goberno e Emerxencias de Galicia (112)
• Ministerio de Fomento e Deputación de Ourense (vías principais afectadas)

Balance de Incidencias

A rede viaria sufriu cortes significativos por seguridade:

• Estrada de Cualedro: Zonas afectadas en Paredes e Rebordachá.
• Paredes: Cortes na entrada polas Riscas e tramo cara Zós.
• OU-301: Tráfico cortado a Gudes.
• Pista das Riscas: Pechada en terra e asfalto.
• Pista de Parada a Damil: Cortada.
• Avenida Río Limia: Cortada á altura do Matadoiro.
• Outros cortes: Pista das Donas, Pista dos Cobos, e baixo o túnel da A-52 en Boado.
• Zonas de especial precaución: San Pedro – Moreiras, Moreiras – Abavides, O Raposo, Lamas – San Vitoiro, e accesos a Fiestras, Laroá e Seoane.

Afectación a Instalacións e Suspensión de Actividades

Ademais de afectar aos institutos IES Lagoa de Antela e IES Cidade de Antioquia, o Campo da Moreira atópase asolagado, o que levou á cancelación de todas as actividades deportivas programadas. Mantense vixilancia sobre o Pavillón de Deportes, as Piscinas Municipais e o estadio J.A. Carrera debido ao risco de inundación.

Chamamento á Prudencia

Amador Díaz subliñou a importancia da autoprotección e da colaboración cidadá. “Activamos todos os resortes legais e operativos dos que dispón o Concello. A situación é moi complexa e cambiante, polo que rogamos aos veciños que respecten escrupulosamente os cortes de estrada e non se expoñan a riscos innecesarios”, declarou o alcalde.

Recomendacións Urxentes á Poboación

• Evitar desprazamentos non esenciais.
• Non cruzar zonas asolagadas, nin a pé nin en vehículo.
• Manterse informado a través das canles oficiais.
• Ante calquera emerxencia grave, chamar ao 112.

Saber máis · Descubre A Limia Xinzo de Limia 9.699 habitantes · 20 parroquias Coñecer o concello →