27 feb 2025. Actualizado ás 19:19 h.
A Deputación publicou, un ano máis, o programa provincial do Entroido 2025, unha guía que reúne os principais eventos desta festividade en toda a provincia. Para que chegue ao maior número posible de interesados, a guía distribuirase en locais de hostalería e oficinas de turismo de Ourense.
Con unha tirada de 5.000 exemplares, ofrece un percorrido detallado polo Entroido, recompilando máis de 350 actos organizados en 65 localidades pertencentes a 39 concellos. A programación prolongarase ata o 9 de marzo, Domingo de Piñata, con propostas en Xinzo e Laza, ademais da Festa da Cachucha do Carballiño.
Trátase dunha guía a todo color de 24 páxinas na que se describen diferentes facetas das festas, desde a noite de comadres ata os personaxes típicos de cada zona como son o felo de Esgos, o vellarón de Ríos ou o labardeiro de Mugares (Toén), figuras menos coñecidas que as pantallas de Xinzo ou os boteiros de Viana. É unha recompilación de desfiles, saídas e festas de disfraces que comparten protagonismo coas celebracións gastronómicas, cada vez máis numerosas na provincia. Porque se algo caracteriza calquera festexo galego é que remata (ou comeza) arredor dunha mesa, con moita comida e non menos bebida.
O Entroido de Ourense é unha das manifestacións culturais máis importantes de Galicia e de todo o Estado, con algunhas celebracións que gozan de recoñecemento oficial de interese turístico. Destaca o de Xinzo de Limia, o único en España coa distinción de interese turístico internacional debido á súa espectacularidade e á duración dos seus festexos. Verín tamén é protagonista co seu tradicional cigarrón, cunha festa de interese turístico nacional. Laza, Vilariño de Conso, Manzaneda, Viana do Bolo e Maceda están recoñecidos como festas de interese turístico galego.
Desde a Deputación de Ourense destacan a importancia da publicación como unha ferramenta fundamental para a promoción do Entroido, axudando a preservar e difundir o patrimonio cultural e etnográfico da provincia. O obxectivo é seguir fomentando a participación de veciños e turistas nunha festividade tradicional e de gran arraigo social na que participan veciños de todas as idades.
Ademais da distribución en formato físico, o programa tamén estará dispoñible en formato dixital na páxina web do Inorde e nos canais oficiais da Deputación, permitindo así un acceso máis amplo a toda a programación.
Archivado en: Entroido, Deputación de Ourense, Laza, Turismo, Esgos
