Os tractores abandonaron este venres a cidade de Ourense despois de 25 días de protesta. Gandeiros e agricultores retiráronse da estrada nacional N-120, que se reabriu ao tráfico pola tarde tras case unha semana cortada.
A loita destes profesionais, que comezou o 29 de decembro coa chegada de ducias de tractores ao centro da cidade e a ocupación do entorno da Subdelegación do Goberno, continúa. Os manifestantes están a preparar máis accións para seguir loitando por melloras para o sector primario. As súas demandas inclúen cuestións como a futura redución das axudas da PAC, a prevención da dermatose nodular, o incumprimento da Lei da Cadea Alimentaria, os baixos prezos de produción, a xestión do purín, a protección da fauna salvaxe e o recorte de servizos no rural.
Durante as semanas de mobilización, que coincidiron coa firma do tratado da Unión Europea con Mercosur, o Parlamento Europeo paralizou o acordo para pedir a súa revisión. Os manifestantes consideran esta decisión un respiro, pero non unha vitoria definitiva.
Segundo o portavoz da Asociación do Sector Primario de Galicia, Miguel Gómez, o principal logro das protestas foi concienciar á sociedade sobre a importancia do sector primario e visibilizar as consecuencias do acordo con Mercosur. A pesar das reunións con diferentes administracións públicas, os manifestantes aínda esperan máis encontros institucionais.
A protesta tamén se fixo notar noutras localidades, como Xinzo de Limia, onde os produtores deixaron varios tractores aparcados na praza da Casa da Cultura como anticipo á celebración do «petardazo» do entroido.
