O PSOE de Xinzo denunciou a «grave» situación do núcleo de Gudín, que leva varios meses sen acceso á auga potable da rede municipal. Exixen ao Concello que restableza urxentemente o servizo, en condicións sanitarias adecuadas para o consumo doméstico.
O grupo municipal considera que é un problema de saúde pública e critica a falta de atención do goberno local. Lembran que hai máis dun mes o Concello asumiu a titularidade da concesión de augas, antes xestionada pola comunidade de usuarios de Gudín.
Elvira Lama, portavoz do PSOE, indicou que os veciños teñen que comprar auga regularmente pola insuficiencia da proporcionada polo Concello. Presentaron un escrito ao alcalde para que axilice as xestións coa empresa concesionaria.
Data: 16 de maio de 2025
