Un total de 12 clubs de baloncesto base da Delegación Zonal de Ourense constituíron este xoves, 2 de xullo, a nova Asociación Ourensá de Clubs de Baloncesto Base (AOCBB) co obxectivo de defender os seus intereses e fomentar a práctica deportiva.
A fundación tivo lugar na Sala de Xuntas das Federacións, situada no barrio do Couto, en Ourense. Tras un proceso de debate e análise dos estatutos, os 12 clubs promotores asinaron a acta fundacional e os documentos que rexerán o funcionamento da nova entidade.
Os clubs fundadores que integran a AOCBB son:
- CBF Barco
- EDO Blanco Amor
- AD Bosco
- CB Burgas
- Carmelitas
- BXL Celanova
- CB Deordima
- CB Val de Lemos
- Club Maristas
- CD María Trinidad Miraflores
- CB Xuventude Verín
- AB Xinzo
Desde a asociación sinalaron que o resto de clubs da delegación teñen as portas abertas para sumarse ao proxecto cando o desexen. A estrutura organizativa estará composta por unha Asemblea Xeral, onde cada club contará cun voto, e unha Xunta Directiva encargada da representación institucional, que se renovará cada mes de xullo ao remate da tempada.
Os fins principais desta nova entidade son:
- Potenciar o baloncesto base na delegación ourensá.
- Velar pola boa relación e o respecto entre os clubs.
- Representar ao sector ante a Federación Galega de Baloncesto e outras institucións.
- Defender os dereitos dos clubs e mellorar as súas condicións económicas e de instalacións.
- Organizar actividades de formación para xogadores e adestradores.
O primeiro paso oficial da asociación terá lugar o vindeiro martes 7 de xullo, data na que celebrarán unha reunión coa Federación Galega de Baloncesto, que preside Julio Bernárdez.
