Xinzo de Limia, 24 de xaneiro de 2026. O alcalde de Xinzo de Limia, Amador Díaz, e o tenente de alcalde, Antonio Fernández, mantiveron unha xuntanza de traballo con Javier Losada, representante da Asociación do Sector Primario de Galicia, para coordinar a situación tras os axustes na programación do Petardazo.
Na reunión, confirmouse que ningunha das partes tivo a intención de alterar a programación orixinal do evento. O sector agrario, que mantén as súas reivindicacións contra o acordo co Mercosur, aclarou que a súa vontade nunca foi interferir no desenvolvemento do Petardazo. O Concello, pola súa banda, recalcou que respecta as mobilizacións do sector e que en ningún momento actuou en contra das súas demandas.
As alteracións na programación responderon unicamente a motivos estritos de seguridade e ao cumprimento do Plan de Autoprotección. Un requisito técnico e legal que, ante a imposibilidade de despregar o dispositivo da AXEGA pola meteoroloxía (a alerta nas estradas impedía o desprazamento do camión de Posto de Mando Avanzado), obrigaba á suspensión dos actos masivos independentemente de calquera outra circunstancia.
Como froito deste diálogo, os agricultores e gandeiros teñen previsto retirar a súa maquinaria a media tarde de hoxe, deixando unicamente un tractor de xeito simbólico no centro da praza como testemuño da súa protesta polo acordo co Mercosur. Deste xeito, garántese a mobilidade e o cumprimento das medidas de seguridade para o resto das actividades do Entroido.
