O CEIP Plurilingüe de Os Blancos celebrou a súa 1ª Feira da Ciencia, un evento pioneiro na provincia que transformou o centro nun laboratorio interactivo. A xornada contou coa participación de case 50 alumnos e alumnas que, en colaboración co CRA Monterrei, demostraron unha metodoloxía baseada na aprendizaxe práctica e experimental.
Esta iniciativa destaca por ser a primeira en involucrar de xeito activo ao alumnado de educación infantil en dinámicas de exposición pública. O proxecto foi coordinado polo profesor Manuel Lamoso, quen aplicou a metodoloxía do Club de Ciencias. Durante todo o curso, os estudantes participaron en obradoiros semanais organizados en equipos de idades mixtas para preparar os seus propios experimentos.
Desenvolvemento e experimentos
A feira distribuiuíse en seis postos interactivos (tres para Os Blancos e tres para o CRA Monterrei) e contou ademais cunha aula de luz negra. Entre as actividades presentadas polos pequenos científicos destacaron:
- Extracción de clorofila e pigmentos naturais.
- Estudo do ciclo biolóxico das xoaniñas.
- Demostracións de electricidade estática.
- Experimentos de columnas de densidades (xabón, aceite e auga).
- Xogos de gravidade con fíos e cohetes de cartón.
- Reaccións químicas utilizando cúrcuma.
Clausura e impacto educativo
O evento rematou coa interpretación do «Himno Eureka», unha peza musical creada polo propio alumnado que percorre a historia da ciencia utilizando instrumentos construídos con materiais reciclados.
A directora do CRA Monterrei, María Teresa Santamaría, valorou positivamente este modelo de traballo, sublincando o gran potencial das escolas do medio rural e a importancia de coordinar proxectos entre diferentes centros para potenciar a socialización dos menores.
