As deputadas do PP, Rosa Quintana e Carmen Leyte, esixiron hoxe ao Goberno de España que remita canto antes á Comisión Europea o informe sobre o estado do lobo, un paso necesario para permitir que as comunidades autónomas xestionen a poboación desta especie con criterios técnicos.
A reclamación realizouse durante unha visita a unha explotación gandeira en Recarei (Bande), onde a propietaria sufriu un ataque de lobos este mesmo luns. As representantes do PP subliñaron que o informe que avala o estado de conservación do lobo xa foi aprobado o pasado 22 de xuño e que a demora actual impide aplicar plans de control axeitados, coma o que xa emprega Asturias para protexer o gando.
Sobre as axudas ao sector, o PP lembrou os datos de investimento da Xunta para facer fronte aos ataques:
- 13,8 millóns de euros mobilizados na última década.
- 850.000 euros destinados a axudas só no ano 2025.
- As axudas inclúen a compra de cans protectores, pastores eléctricos e peches de seguridade para o gando.
Segundo as populares, o obxectivo debe ser a convivencia entre a conservación do lobo e a viabilidade das explotacións gandeiras, fronte ao actual bloqueo administrativo que provocou, incluso, un procedemento de infracción por parte de Europa contra España.
