Luns, 16 de novembro Xinzo 15° Garda: MARIA SOLEDAD RODRIGUEZ GARRIDO
CDR O Viso

O CDR O Viso promove unha xornada comunitaria arredor da memoria e das tradicións no rural

2 min de lectura

Fonte
CDR O Viso
Publicada
11 abr.
Ver a noticia orixinal

No marco do proxecto Comunidades Inclusivas, o Centro de Desenvolvemento Rural O Viso desenvolveu recentemente unha actividade comunitaria na que participaron persoas procedentes de Cortegada e Folgoso, nunha proposta orientada á recuperación da memoria colectiva e ao fortalecemento dos vínculos interxeracionais.
A xornada comezou cunha fornada tradicional na que persoas maiores e cativos compartiron tempo e coñecementos arredor da elaboración do pan, recuperando prácticas propias das aldeas. Durante a actividade, púxose en valor o papel do forno como espazo de encontro, onde antigamente varias familias se reunían non só para facer o pan, senón tamén para socializar, intercambiar experiencias e reforzar a cohesión comunitaria.
Posteriormente, o grupo visitou as Casas da Memoria de Lodoselo, nun percorrido centrado na recuperación do pasado mineiro da zona. A través dos relatos e recordos compartidos, afondouse nas condicións de vida e traballo que marcaron xeracións anteriores, poñendo en valor o esforzo e a resiliencia das comunidades locais.
A actividade concluíu cun espazo de encontro no que se conmemorou o Día da Revolta da España Baleirada. Neste contexto, as persoas participantes reflexionaron sobre os retos actuais do rural e reivindicaron a necesidade de seguir defendendo un modelo de vida ligado ao territorio, baseado na proximidade, na comunidade e no aproveitamento dos recursos propios.
O CDR O Viso continúa así promovendo accións que contribúan a reforzar a identidade colectiva, favorecer o intercambio de saberes e impulsar procesos de participación que sitúen ás persoas no centro do desenvolvemento rural.
O proxecto de innovación social “Comunidades inclusivas: solucións innovadoras de coidado e apoio no medio rural” é unha operación do Ministerio de Traballo e Economía Social no marco do Programa estatal do Fondo Social Europeo Plus (FSE+) “Inclusión social, garantía infantil e xuvenil e loita contra a pobreza”, impulsado por Coceder e cofinanciado pola Unión Europea, e financiado pola Consellería de Política Social e Igualdade da Xunta de Galicia, dentro da subvención para a implantación de programas de interese social con cargo á asignación fiscal do 0,7% do IRPF. Comisión Europea en España Eusocial Coceder.
 

PNFPB Install PWA using share icon

For IOS and IPAD browsers, Install PWA using add to home screen in ios safari browser or add to dock option in macos safari browser