Os veciños de Baltar sofren cortes no subministro de auga dende hai tres días, afectando tanto a vivendas como a negocios, ao centro de saúde e ao centro de día.
O BNG local solicitou información oficial ao Concello este 19 de agosto para coñecer os motivos da avaría e as solucións previstas. Ante a falta de auga, os nacionalistas piden que se activen medidas de urxencia:
- Reparto de auga entre os veciños afectados.
- Uso de cisternas para garantir o servizo nos centros públicos.
- Mellor información sobre o tempo estimado de reparación.
Actualmente, os operarios municipais buscan a fuga de xeito manual. O BNG reclama que se empreguen medios técnicos especializados para localizar a avaría máis rápido e evitar que os traballadores sufran as consecuencias da actual vaga de calor.
