Os representantes de 13 clubs de baloncesto da provincia reuníronse este martes en Ourense co presidente da Federación Galega, Julio Bernárdez, para presentar o seu novo proxecto común de colaboración.
A recentemente creada Asociación Ourensá de Clubs de Baloncesto Base (AOCBB) busca potenciar a formación dos xogadores e adestradores, ademais de fomentar o baloncesto nos colexios. O obxectivo é manter a Ourense como a provincia con máis licenzas por habitante de toda Galicia.
Estes son os 13 clubs que forman parte da asociación actualmente:
- AB Xinzo, AD Bosco, BXL Celanova, Burgas Basquet, Carmelitas, CB Depordima, CB Val de Lemos, CB Xuventude Verín, CD María Trinidad Miraflores, CF Barco, Club Maristas, EDO Blanco Amor e ID Sarmientos de Rivadavia.
A directiva da entidade anima a sumarse a calquera outro club de formación da provincia que aínda non estea asociado. Nos próximos días, o colectivo ten previsto reunirse con responsables da Xunta de Galicia, a Deputación de Ourense e o Concello de Ourense para avanzar na súa folla de ruta.
