Un total de doce clubs de baloncesto da Delegación de Ourense constituíron este xoves, 2 de xullo, a nova Asociación Ourensá de Clubs de Baloncesto Base (AOCBB) co obxectivo de defender os seus intereses e fomentar a práctica desta disciplina.
A entidade formalizouse tras unha xuntanza celebrada na Sala de Xuntas das Federacións, situada no barrio do Couto. Tras dúas horas de debate sobre os estatutos e as finalidades da asociación, os clubs fundadores asinaron a acta que pon en marcha esta nova organización, que xa ten programada a súa primeira reunión oficial co presidente da Federación Galega, Julio Bernárdez, para este vindeiro martes 7 de xullo.
Os doce clubs fundadores que integran a AOCBB son:
- CBF Barco
- EDO Blanco Amor
- AD Bosco
- CB Burgas
- Carmelitas
- BXL Celanova
- CB Depordima
- CB Val de Lemos
- Club Maristas
- CD María Trinidad Miraflores
- CB Xuventude Verín
- AB Xinzo
Desde a asociación sinalan que o resto de clubs da delegación están invitados a sumarse ao proxecto no momento que o desexen. En canto ao seu funcionamento interno, a AOCBB rexerase pola súa Asemblea Xeral baixo o principio de «un club, un voto». A Xunta Directiva, que actuará como órgano de representación institucional, renovarase anualmente cada mes de xullo.
Os fins principais da nova entidade son:
- Potenciar o baloncesto base dentro do ámbito da delegación ourensá da Federación Galega.
- Velar polo respecto e fomentar a boa relación entre todas as entidades asociadas.
- Representar aos clubs ante a Federación, institucións e outros organismos para defender os seus dereitos e promover melloras nas instalacións e no financiamento.
- Organizar eventos formativos dirixidos a xogadores e adestradores para elevar o nivel técnico do baloncesto provincial.
