O Concello de Xinzo de Limia inaugura este mércores, 1 de xullo, a tempada de baño nas piscinas municipais ao aire libre, que estarán operativas durante os meses de xullo e agosto.
As instalacións abrirán de luns a domingo, en horario ininterrompido de 12.30 a 20.30 horas. Antes desta apertura, o goberno local realizou obras de mantemento para mellorar a seguridade dos bañistas, consistentes na renovación integral dos bordos dos vasos para eliminar lousas deterioradas e evitar escorregóns.
Para complementar a oferta estival, o Concello manterá aberta a piscina climatizada durante o mes de xullo cun horario reducido, de 07.00 a 12.00 horas, para atender a usuarios con prescrición médica ou preferencias persoais. Esta instalación pechará en agosto para realizar as súas tarefas de mantemento habituais.
En canto ás tarifas, que se manteñen conxeladas respecto ao ano anterior, a estrutura de prezos é a seguinte:
- Entrada individual: 2,30 euros (16-65 anos) e 1,60 euros (nenos de 4 a 16 anos e maiores de 65 anos).
- Acceso gratuíto: Menores de 4 anos.
- Abonos de tempada: 60 euros (familiar), 30 euros (adultos) e 15 euros (menores de 16 anos e maiores de 65).
Por outra banda, o municipio de Celanova tamén inaugura este mércores as súas piscinas públicas, cun horario de tarde que comezará ás 15.00 horas e que terá entrada gratuíta durante esta primeira xornada.
