A organización sindical Unións Agrarias solicitou á Consellería do Medio Rural a convocatoria urxente da Mesa da Pataca de Galicia. A medida responde ás graves dificultades que enfrontan os agricultores, especialmente na comarca de A Limia, debido ao anegamento continuado das zonas de cultivo a causa do mal tempo.
Unións Agrarias esixe que neste órgano participen a administración autonómica, a industria e os produtores amparados pola Indicación Xeográfica Protexida (IXP) Pataca de Galicia. O obxectivo principal será analizar a situación actual, propoñer solucións e aprobar medidas para paliar a drástica redución de ingresos que sofren as explotacións.
Carlos Basalo, responsable de Agricultura de Unións Agrarias, sinalou que os profesionais enfróntanse a unha conxuntura desfavorable marcada por prezos en orixe moi baixos e un aumento dos custos de produción, sumado a chuvias que manteñen as fincas anegadas. Os prezos chegan a ser de apenas 12 céntimos por quilo, o que, segundo o sindicato, podería forzar aos agricultores a vender a perdas, incumplindo a Lei da cadea alimentaria.
Ademais, Unións Agrarias instou á Deputación de Ourense a crear unha liña de axudas económicas directas para o sector da pataca, similar á xa anunciada para o sector da carne. Destácase a importancia estratéxica da pataca en Galicia, que lidera o cultivo de media estación en España co 53% da superficie nacional (aproximadamente 16.000 hectáreas), o que supón unha produción anual de arredor de 310 millóns de quilos.
Fonte: www.diariodolimia.gal
