Xornada na Boullosa (Baltar) de posta en valor e defensa do Larouco

O vindeiro sábado, 7 de febreiro, terán lugar dúas charlas abertas ao público no Restaurante Palomín da Boullosa, no marco do ciclo “Os Meses do Larouco”. O evento busca analizar a relación entre os incendios forestais e a presión exercida por grandes corporacións agroindustriais, mineiras e enerxéticas.

A xornada comezará ás 13:00 horas cunha posta en común das plataformas Auga Limpa Xa, Amigas das Árbores e Stop Eólicos A Limia Xurés Celanova, baixo o título “Como os lumes socavan as resistencias: Experiencias do MEL, Amigas das Árbores e Stop Eólicos A Limia Xurés Celanova”. Posteriormente, haberá un xantar con reserva previa (teléfono 608 09 38 06, prezo 16 euros).

Xa pola tarde, ás 15:00 horas, membros da Asociación de Veciños de Lucenza (Cualedro) e do Club de Voo Larouco (Baltar) presentarán iniciativas e proxectos relacionados co Larouco no ámbito da gandería, o deporte e o turismo, baixo o título “Proxectos arredor do parapente e da gandaría en Baltar e en Lucenza: Iniciativas desde o Club Voo Larouco e a AA.VV. Lucenza”.

Esta xornada pretende poñer en diálogo as loitas contra o que se describe como “espolio” territorial co problema dos incendios que, segundo os organizadores, contribúen ao despoboamento e á degradación do territorio.