Xinzo de Limia, 13 de xaneiro de 2026. A feira quincenal, que se celebrará este mércores 14 de xaneiro, modificará a súa localización habitual na Alameda do Toural debido á protesta do sector agrario. Decenas de tractores permanecen estacionados nesta alameda, polo que o Concello de Xinzo de Limia tomou a decisión de trasladar, de forma provisional, o mercado á rúa Carmen Nóvoa Diz e á rúa Toural.
Os postos de venda que normalmente se instalaban na Alameda do Toural situaranse na rúa Carmen Nóvoa Diz. Alí compartirán espazo cos vendedores que xa tiñan a súa localización habitual nesta rúa. A distribución dos postos será nunha soa banda da rúa, xunto ao parque, co obxectivo de garantir o paso peonil e o acceso dos vehículos de emerxencia.
Dende o Concello fan un chamamento á colaboración da cidadanía. Solicítase especial precaución na circulación e na hora de estacionar os vehículos nas rúas afectadas polo cambio temporal. Esta modificación da localización da feira cualifícase como unha medida «excepcional» e temporal.
