O CDR O Viso pecha Pobo Escola e prepara o Campamento Concilia Rural en Lodoselo

O Centro de Desenvolvemento Rural O Viso rematou a edición 2025 do programa Pobo Escola, que acolleu a case 1000 escolares de máis de 40 centros da provincia nunha experiencia de inmersión rural en Lodoselo. Durante as xornadas, elaboráronse máis de 1300 pans, realizáronse 150 paseos coa burra Terra e plantáronse mil carballos.

A continuación, o CDR O Viso dará comezo ao campamento Concilia Rural, que se desenvolverá do 1 de xullo ao 31 de agosto, con 160 nenos e nenas divididos en catro quendas. O campamento, financiado pola Consellería de Política Social e Igualdade da Xunta de Galicia, busca “educar xogando e convivir coidando” a través de actividades que combinan a interacción con persoas, animais e árbores, incluíndo piscina, horta, actividades interxeracionais, xogos e música.