Etiqueta: prensa local

O Auditorio Ángel Cocho acolleu a gala dos Premios da Cultura 2025 de Xinzo de Limia, un acto no que se recoñeceu o talento, a creatividade e o compromiso social que definen a identidade cultural da vila. Nesta edición entregáronse 12 premios e dúas mencións honoríficas especiais, con galardóns que abranguen desde a historia e a tradición ata as expresións culturais máis contemporáneas.

O Premio Especial da Cultura 2025 foi para Edelmiro Martínez Cerredelo, cronista oficial de Xinzo de Limia, polo seu labor de investigación e divulgación da historia local. No ámbito das letras, Antón Riveiro Coello recibiu o Premio á Defensa e Promoción da Lingua pola súa traxectoria narrativa e a proxección da Limia na súa obra.

A cultura popular tivo un papel destacado coa entrega do premio aos artesáns das Pantallas Aurora Dacal e Santiago Martínez, de Arte Arrebol, xunto con Juan López “Juanillo Antioquia”, así como a Os Manda Truco, recoñecidos pola súa creatividade e máis de tres décadas de achega aos desfiles de carrozas do Entroido.

No apartado audiovisual, foron distinguidas Cecilia Perólio, na categoría de Cine e TV, e as irmás Alba e Iria Prol en Artes Visuais e Documental. A música estivo representada pola innovación de Milocho Oro e Os Festicultores Troupe e pola tradición de Os Jalos d’Antioquia, que celebran o seu 25º aniversario. O Colectivo de Baile Danzón recibiu o Premio ao Movemento Cultural polo seu labor formativo desde 1995.

Completaron a relación de premiados as Veciñas de Ganade e “As Sabelas”, polo seu activismo na revitalización do rural; a Tapería Cinco Rutas, distinguida pola súa traxectoria como espazo social durante 41 anos; e o deseñador José Manuel Formoso “Gori”, creador dunha iconografía gráfica propia para a vila.

A gala incluíu tamén dúas mencións “In Memoriam”: aos “Laguneros”, pola súa integración e achega á diversidade de Xinzo, e aos Veteranos das Comisións do Entroido, recoñecidos co Premio Irene Moca por manter viva a festa nos momentos máis difíciles da súa historia.

O concelleiro de Cultura, Carlos Gómez, destacou a "enorme calidade humana e artística" desta edición, subliñando o orgullo dun pobo que honra as súas raíces e aposta polo talento cultural.