O Parque do Pombal de Xinzo de Limia dispón dun novo punto de información turística e ambiental sobre as Areeiras da Limia. Trátase dun tótem interactivo, financiado polo Concello de Xinzo e a Cámara Oficial Mineira de Galicia, co obxectivo de divulgar os valores históricos e ecolóxicos deste espazo natural.
O monolito inclúe un código QR que permite aos usuarios acceder dende os seus teléfonos móbiles a vídeos e información detallada sobre as Areeiras da Limia. Este código dirixe á plataforma dixital de Patrimonio Xeomineiro de Galicia, onde se atopan contidos audiovisuais e explicacións de especialistas sobre a biodiversidade e a historia xeolóxica da comarca. Coa iniciativa, o Concello de Xinzo de Limia busca achegar o patrimonio natural aos cidadáns e aos centros educativos a través das novas tecnoloxías.
