O Concello de Xinzo asinou un convenio para a implantación do programa Axente Titor, que comezará a funcionar no curso escolar 2025/2026. Este programa designa un axente da Policía Local, con formación específica, para o seguimento de situacións que afecten á infancia e á adolescencia, como acoso escolar ou condutas de risco, tanto en centros educativos como en espazos públicos.
Na reunión de firma do convenio participaron o alcalde Amador Díaz Penín, o concelleiro Ramón Gómez, o inspector xefe Jose Estévez, o axente titor asignado Antonio Díaz, e os directores dos institutos Ana Martínez e José Manuel Coedo.
Paralelamente, inícianse os trámites para constituír un Consello Escolar Municipal para garantir unha resposta coordinada ante problemáticas da mocidade, priorizando a prevención.
O Axente Titor actuará como figura de referencia e mediación entre os mozos, familias, centros educativos e corpos policiais, participando en actividades educativas e campañas de sensibilización para garantir a seguridade e benestar dos menores.
