Xinzo de Limia acolle a celebración do Nadal cunha programación chea de música, solidariedade cos afectados pola DANA, e moita alegría e humor. Esta última faceta proporcionaralle a orixinal agrocabalgata, con tractores engalanados con motivos navideños, nos que Papá Noel percorrerá as rúas da vila este martes 24 de decembro, a partir das sete da tarde, saíndo da Praza Maior.
Esta iniciativa, que xurdiu hai catro anos nunha parroquia do concello, trasladouse á capitalidade e constitúe unha boa forma de celebrar nas rúas antes das ceas familiares da Noiteboa.
Música e donativos
A programación nadalicia de Xinzo inclúe varios concertos, algúns xa celebrados como os de Guadi Galego, a Agrupación Musical da Limia e Rubén Simeó. Aínda que as entradas foron gratuítas, o Concello habilitou unha «fila cero» para recadar donativos destinados ao CEIP Ausias March de Paiporta (Valencia), afectado pola DANA. Esta iniciativa conta coa colaboración do CEIP Rosalía de Castro de Xinzo.
A recadación de donativos tamén estará presente noutros espectáculos como «El Musical de los 80 y 90» (Auditorio Ángel Cocho, xoves 26 ás 20:00 h) e «Vaiana: El Musical» (2 de xaneiro).
Ademais da música, os limianos e visitantes poderán gozar doutras actividades culturais, como a exposición fotográfica de Noelia Caseiro na Rúa dos Viños e a entrega dos Premios da Cultura 2024 este venres.
O Teatro Aneis encheu a Casa da Cultura de Xinzo.
