Nas inmediacións do polígono industrial de Curtis (A Coruña) instalaráse unha nova planta de biometano, impulsada por Alberto López. A súa posta en marcha está prevista para o primeiro semestre de 2026 e creará arredor de 25 postos de traballo.
Trátase da segunda planta de biometano proxectada para este polígono, despois da de Vertex Bioenergy. Recentemente, recibiu a declaración de Proxecto Industrial Estratéxico (PIE) por parte da Consellería de Economía.
O grupo Nortegas investirá preto de 16 millóns de euros na construción desta terminal, que transformará residuos orgánicos procedentes do sector gandeiro e avícola (nun radio de 15 a 25 quilómetros), así como da industria agroalimentaria, en gas natural renovable.
A planta terá capacidade para procesar 96.000 toneladas anuais de residuos, xerando entre 42 e 45 gigavatios hora ao ano, que serán inxectados na rede de gas. Aproveitaranse os residuos do proceso de descomposición para obter biogás. Os residuos resultantes serán entregados aos gandeiros que subministren purín vacún á planta, e o resto será depurado para ser reutilizado como composto ou abono orgánico.
A creación de emprego será un dos seus principais beneficios, xerando 25 postos de traballo, 7 deles directos. As instalacións, que ocuparán 25.690 metros cadrados, incluirán un edificio administrativo, zonas de almacenamento, de produción e mellora do biogás, almacenamento de digestato, unha zona contraincendios, zonas verdes e unha estación depuradora de augas.
A Consellería de Economía considera que a declaración como PIE “enmárcase na filosofía do Goberno galego por axilizar e desburocratizar os procedementos administrativos, permitindo adiantar os prazos de implantación das actividades industriais e, polo tanto, da creación de emprego”. O proxecto incluirase no plan autonómico de impulso e aceleración de proxectos industriais.
Outras iniciativas similares están a desenvolverse en Galicia, como as proxectadas por Vertex (tamén en Curtis), o consorcio formado por Agroamb Prodalt, Enagás Renovables e Genia Bioenergy (Castro de Rei, Lugo), Bioenergía Lugo (Lamablanca), Bioenergía Coruña (Laracha) e Bioenergía Ourense (Sarreaus).
