A pequena Alanna, filla de Iria Canosa e Iván Dacal, veu ao mundo o xoves no hospital de Verín.
Os tres hospitais da provincia de Ourense – os da cidade, O Barco de Valdeorras e Verín – xa pecharon o ciclo dos primeiros nacementos do ano. Despois de Aroa (Ourense) e Victoria (O Barco de Valdeorras), chegou Alanna na noite do xoves no Hospital de Verín. Curiosamente, os tres centros de referencia da área sanitaria comezaron o ano 2025 con tres nenas, e en todos os casos os pais son primeiroizos.
Alanna é filla de Iria Canosa Blanco e Iván Dacal Fraga, ambos os dous veciños de Xinzo de Limia de 34 anos. O nacemento rexistrouse ás 23:35 horas do xoves día 9, e Alanna pesou 4,2 quilos. Xa en casa, e coa tranquilidade de compartir a chegada de Alanna coa familia, Iván Dacal recoñece que a xornada do xoves foi complicada para a nai. «Entramos ás oito da mañá e como non ía adiante a cousa tivo que ser por cesárea. Agora xa está a situación normalizada e a nai xa se pode levantar e toma a medicación que lle receitaron», apunta Iván Dacal.
Adaptándose á nova realidade e á convivencia cunha máis na familia —»O primeiro día ben, o segundo xa deu algo máis de traballo pero xa estabamos advertidos que ía ser así, co cal todo vai con normalidade e gozando desta nova situación»—, o pai recoñece que no futuro Alanna podería compartir a vivenda familiar con algún irmán. «É o noso primeiro fillo e hai que ver como vai a cousa. Máis adiante veremos pero seguramente teremos máis fillos», apunta.
O primeiro nacemento do ano rexistrouse no CHUO. Aroa naceu cando faltaban dezaoito minutos para as dúas da madrugada do día 1 de xaneiro e é filla de Raquel Fernández Pérez e Alejandro Gayoso. Victoria naceu un día despois, o 2 de xaneiro, ás 13:40 horas no Hospital Comarcal de Valdeorras. Betsy Leonor Suárez Fernández e Yrán Manuel Peña Calviño son os seus pais. E no Hospital Comarcal de Verín naceu Alanna o xoves, día 9, sendo os seus pais Iria Canosa Blanco e Iván Dacal Fraga.
