A igrexa parroquial de Parada de Ribeira, en Xinzo de Limia, volveu abrir as súas portas tras un acto de purificación celebrado polo bispo de Ourense, Leonardo Lemos Montanet. A cerimonia foi necesaria para volver bendicir o templo despois de que ladróns roubasen hai uns días varios cálices e a cruz procesional.
O rito consistiu nunha procesión, a limpeza simbólica do recinto e unha primeira misa. O acto contou co apoio masivo dos veciños da zona e coa presenza do alcalde de Xinzo, Amador Díaz.
Este roubo en Parada de Ribeira súmase a unha onda de asaltos que están a sufrir varias igrexas na comarca da Limia nas últimas semanas, causando importantes perdas no patrimonio relixioso e histórico dos nosos concellos.
