Ourense. A Deputación de Ourense inaugura hoxe, venres 26 de decembro, a 30ª edición de Pazolandia no Pazo Paco Paz, consolidándose como o evento de ocio familiar de referencia na provincia durante o Nadal. Nesta edición, Pazolandia destaca pola súa aposta pola innovación e a inclusión, coa participación confirmada de 62 concellos.
Para celebrar as súas tres décadas de historia, Pazolandia presenta novidades como o «King Joker», unha atracción de 18 metros de altura; un circuíto de coches tolos eléctricos; un labirinto infantil de temática Halloween adaptado aos máis pequenos; e un mural conmemorativo de LEGO composto por máis de 56.000 pezas.
Ademais da oferta lúdica, a edición deste ano pon énfase na diversidade e a inclusión. Incorporáronse medidas para garantir unha experiencia accesible para todos os nenos e nenas, incluíndo zonas de calma para menores con Trastorno do Espectro Autista (TEA), espazos de lactancia e unha área preinfantil con xogos adaptados. O 3 de xaneiro pola mañá terá lugar unha sesión especial de «Pazolandia Inclusiva» sen ruído ambiental. Para facilitar o acceso a nenos con necesidades especiais, haberá pulseiras identificativas para evitar colas e dispoñibilidade de auriculares illantes de ruído para persoas con hipersensibilidade auditiva.
A oferta complétase con obradoiros sensoriais como «Xogo de fíos» e sorteos en todas as sesións. O recinto contará cun amplo dispositivo de seguridade e emerxencias, con presenza permanente de persoal sanitario, forzas de seguridade, bombeiros e Cruz Vermella.
