O concello de San Xoán de Río, en Ourense, será a primeira sede oficial do proxecto Impact Campus do 9 ao 12 de abril. Esta iniciativa de innovación social reunirá a máis de 100 líderes de diversos ámbitos para deseñar solucións prácticas e sostibles ao reto demográfico en contornos de menor poboación.
O foro, impulsado pola plataforma Impact Social Cup e co apoio da Xunta de Galicia, a Deputación de Ourense e o Concello de San Xoán de Río, buscará abordar a mellora da mobilidade e o acceso á vivenda, claves para fixar poboación e atraer talento ao rural.
San Xoán de Río foi elixido por estar vinculado a Aldealista, proxecto gañador da Impact Social Cup 2025. O obxectivo é que as propostas xeradas obteñan financiamento e viabilidade, convertendo a Galicia nun referente de innovación territorial exportable a outras comunidades de España.
