O Concello de Vilar de Barrio celebrará as Letras Galegas 2026 cunha programación cultural deseñada para reivindicar a lingua, a tradición oral e o patrimonio inmaterial, promovendo unha visión innovadora da cultura no medio rural como ferramenta de cohesión social e dinamización do territorio.
Calendario de actividades
- Domingo 10 de maio: Inauguración do Recanto das Letras de Vilar de Barrio e celebración dunha foliada popular na Praza do Toural, coa participación das Xunquereteiras, Os Chouteiros de Maceda, pandereteiras e cantareiras de Barrio-Arnuide e a Escola de Música Tradicional de Sarreaus.
- Luns 11 de maio: «As letras da memoria», unha andaina infantil organizada polo CEIP Vilar de Barrio para recoller lendas e vivencias locais vinculadas ao Camiño de Santiago.
- Martes 12 de maio: Obradouro participativo «A voz do rural en Europa», impulsado polo programa Rural Voice*, centrado nos retos do medio rural desde unha perspectiva europea.
- Mércores 13 de maio: Nova edición das «Barferencias», desta vez dedicada ao xacemento arqueolóxico de O Castelo de San Xoán de Bara.
- Xoves 14 de maio: Reparto do agasallo conmemorativo «Aquí nasceu a Limia», co obxectivo de reforzar a identidade territorial.
Segundo o alcalde, Manuel Conde, estas accións buscan a transmisión da memoria e o reforzo do sentimento de pertenza da cidadanía.
