Un grupo de responsables políticos e académicos de México, Ecuador e Bolivia visitou esta semana Xinzo de Limia para estudar como funciona o noso concello e a administración local en Galicia.
A delegación, que participa nun curso internacional de liderado organizado polo Instituto Internacional de Marketing e Comunicación (IMC), mantivo un encontro co alcalde, Amador Díaz. O obxectivo da visita foi intercambiar experiencias sobre a xestión de servizos públicos e os retos de gobernar territorios pequenos.
Durante a xornada, os visitantes asistiron a unha charla sobre comunicación institucional impartida por Marcos Argibay, responsable de comunicación do Concello. Entre os integrantes do grupo destacan:
- Hernán Arturo Rojas Sánchez, reitor da Universidad Estatal de Bolívar (Ecuador).
- Norma Elizabeth Alfaro Leal, reitora da Universidad Magno Americana (México).
- Froylán Muñoz Alvarado, maxistrado federal mexicano.
- Ana Lucía Melena dos Reis, exalcaldesa de Cobija (Bolivia).
Esta actividade forma parte dun programa de formación que percorre distintos puntos de España e Portugal para mostrar o papel estratéxico dos concellos no desenvolvemento social.
