O director xeral de Defensa do Monte, Manuel Francisco, acompañado polo delegado territorial da Xunta en Ourense, Manuel Pardo, mantiveron unha reunión co alcaldes da comarca da Baixa Limia (Entrimo, Bande, Lobios, Lobeira e Muíños) para avaliar vías de colaboración no ámbito da prevención de incendios forestais.
Durante o encontro, destacáronse as ferramentas que a Consellería do Medio Rural ofrece ás administracións locais, entre elas:
- Convenios para a adquisición de maquinaria e brigadas.
- O sistema público para a xestión da biomasa nas franxas secundarias.
Como medida clave, sinaláronse os detalles do novo convenio coa empresa pública Seaga, destinado a apoiar tanto a propietarios como aos concellos no cumprimento das obrigas de xestión da biomasa en franxas secundarias. Este programa conta cun orzamento anual de 25 millóns de euros —o dobre que o anterior— e xa foi solicitado por 295 concellos.
