O Concello de Xinzo de Limia e a Asociación de Inmigrantes Caminando Juntos puxeron en marcha unha campaña solidaria urxente para enviar medicamentos e material de primeira necesidade á poboación afectada polo recente terremoto en Venezuela, en colaboración coa Federación de Venezolanos en Galicia (FEVEGA).
As organizacións fan un chamamento á veciñanza para acadar recursos básicos, organizados nos seguintes bloques prioritarios:
- Medicamentos básicos: analxésicos (Paracetamol, Ibuprofeno), antiinflamatorios, antibióticos sistémicos, antialérxicos e inhaladores para o asma.
- Pediatría: xaropes analxésicos e antibióticos infantís, así como sales de rehidratación oral.
- Material de curas: gasas, vendas, esparadrapo, alcohol, auga oxixenada e iodo.
- Hixiene e insumos xerais: pañais para nenos e adultos, toalliñas húmidas, termómetros e glucómetros.
Para facilitar a participación da cidadanía, habilitáronse tres puntos de recollida na vila:
- Servizos Sociais.
- Concello de Xinzo (primeira planta): preguntar por Guillermo.
- Casa da Cultura: punto xestionado directamente pola Asociación Caminando Juntos.
As persoas que precisen máis información ou queiran resolver calquera dúbida sobre esta campaña poden poñerse en contacto a través do teléfono 605 583 657.
