A Xunta de Galicia suspenderá durante un máximo de dous anos as licencias para novas granxas de porcos, vacas ou aves na conca do río Limia. O obxectivo é evitar que os nitratos procedentes da agricultura contaminen as augas da zona.
Esta suspensión de traballos (chamada moratoria) afectará tanto a novas instalacións como á ampliación de granxas xa existentes. No entanto, non se aplicará nos seguintes casos:
- Explotacións de autoconsumo.
- Solicitudes de modificación feitas antes de onte.
- Solicitudes presentadas por agricultores mozos.
A medida poderá acabar antes se se proba que a contaminación non vén da actividade agraria ou se a zona se declara oficialmente como «zona vulnerable».
Por outra parte, a Xunta presentou alegacións contra o informe do Goberno central, afirmando que non está demostrado que a contaminación sexa agraria en varias zonas de Galicia, tales como:
- Costa Ártabra (Valdoviño e Abegondo).
- Coruña interior (Melide e Santiso).
- Costa da Morte (Zas).
- Coruña Centro (Trazo).
- Rías Baixas (Cambados).
- Rías Baixas Sur (Redondela, Vigo e Baiona).
