A Indicación Xeográfica Protexida (IXP) Pataca de Galicia iniciou estes días a recollida da nova colleita nas diferentes zonas produtoras de toda a comunidade.
O produto certificado comeza a chegar xa aos supermercados, tendas de barrio e canles de venda en liña. A súa presenza nos puntos de venda irá en aumento durante as próximas semanas tanto en Galicia coma no resto de España.
Para garantir que estás a mercar a auténtica Pataca de Galicia, os responsables da IXP recomendan:
- Revisar sempre o etiquetado do envase.
- Buscar os selos e distintivos oficiais da Indicación Xeográfica Protexida.
Este selo de calidade asegura que o produto superou os controis de orixe e trazabilidade —é dicir, que se coñece todo o percorrido da pataca dende a finca ata o supermercado— garantindo así a súa procedencia galega.
