O 21 de marzo de 2004, na 28ª xornada da Liga de Preferente Sur, o Velle e o Antela, ambos loitando pola permanencia (que finalmente lograron), protagonizaron un encontro memorable. Ao cuarto de hora, o Velle gañaba 2-0, pero Piñeiro recortou a diferenza cun penalti e, ao pouco de comezar a segunda parte, Tito Currás empatou o partido. Sierra anotou o gol da vitoria para o Antela no minuto 77, tras unha xogada de Fabián, sendo expulsado dous minutos despois. «A apatía local permite a remontada do Antela», titulou La Voz de Galicia. Unha vitoria agardada, xa que o Antela levaba 21 anos sen gañar no campo do Velle, a última vez sobre terreo de terra.
Desde entón, e ao longo de 22 tempadas, Velle e Antela enfrontáronse 11 veces. En 2011, o Monte da Aira cambiou a superficie a céspede artificial. Antes, nos catro encontros disputados sobre terra, o resultado foi sempre un empate: 3-3 na campaña 04/05 (na que ambos descenderon); e 1-1 nos seguintes encontros, sempre en outubro, de 2005, 2006 e 2008.
Na década dos 2010, ambos clubs tocaron fondo na Segunda Autonómica, aínda que non coincidiron. Volveron a enfrontarse no Monte da Aira en xaneiro de 2014, con vitoria para o Velle por 3-0. Desde 2008, o Antela non sumaba ningún punto en Velle; máis de dezaseis anos sen conseguir un só punto.
Na segunda década do século XXI, o Antela encaixou cinco derrotas ante o Velle, recibindo 14 goles e anotando só 3. As derrotas producíronse en maio de 2015 (2-1), abril de 2016 (3-0), febreiro de 2017 (5-0), setembro de 2017 (2-1) e febreiro de 2019 (2-1 tras unha remontada local). Ambos ascenderon a Preferente na tempada 17/18, pero a tendencia mantívose.
Na pasada tempada en Preferente, tras un rotundo 4-0 na Moreira, o partido da segunda volta, na penúltima xornada, foi crucial para a salvación do Antela (o Velle xa estaba descendido). O partido rematou 4-2 para o Velle, tras unha remontada do Antela que chegou a recortar ata o 3-2.
Ata o 12 de maio de 2024, o Monte da Aira era un campo maldito para o Antela. Este domingo, o encontro presentase como o máis importante da tempada para os limianos.
A última vez que o Antela gañou no Monte da Aira, a alineación era: Emilio, David Hermida, Willy, Fabián, Tito Currás, Neil, Sierra, Piñeiro, Marcos, Pichi e Vila. Tamén xogaron Martiñá e Esteban. Despois dese encontro, o Antela empatou co Gran Peña, gañou ao Maside e empatou co Nogueira antes de pechar a liga cun 3-2 ante o Choco que lle deu a permanencia.
