Os cimentos do Antela

En marzo de 2022, o Antela viaxaba a Celanova con seis baixas para o partido que ía pechar a primeira fase de competición na Primeira galega contra o líder. O equipo cambiara de adestrador (Sabucedo por Julio) e tivera que remontar para se meter na fase de ascenso. O partido era intranscendente para o Celanova, invicto e que ía acabar líder sumando xa 3 puntos de cara a liguilla final. O Antela tiña que gañar para asegurar 2 puntos como terceiro e manter algunha opción de ascenso.
Sabucedo aliñou a Suso na portería e unha defensa con Peque, Breixo, Quintairos e Tazos; no medio Xabi Lamas acompañou a Pancho, e Pedro, Joni e Sergi situáronse por detrás do nove, Borja. Choveu arreo, o Antela xogou ben á contra e adiantouse no minuto 73 cun gol de Pancho, pero o Celanova empatou de penalti no 79. Entraran Carrasco, Manu e dous xuvenís, David Lamas e Borja Carballo. O Antela ía acabar o partido con catro xuvenís no once. Tazos marcou o 1-2 de penalti xa no desconto e Borja Carballo pechou o partido cun disparo cruzado desde a dereita para facer o 1-3.
A historia tivo un final feliz dous meses despois co ascenso a Preferente. Foi a última vez que o Antela xogou en Celanova; a tempada anterior non se disputara a competición e na 19/20, antes da suspensión pola pandemia, o Antela apañara unha goleada (4-0) no Municipal de San Rosendo no primeiro partido da segunda volta, un 12 de xaneiro. No once limiano xogaron Pedro Castro e Juan Forri, agora segundo adestrador.

Aarón, Borja, Cole, Peque, Anxo e Xabi, parte da canteira que consolida ao primeiro equipo.

Hoxe, malia o bo arranque do Celanova -segundo, a dous puntos do Antela-, os de Bruno Gómez chegan en mellor disposición que nos últimos precedentes. Non hai urxencias nin soberbia. A paciencia e o traballo convertéronse en guías do club. A canteira é unha realidade.
Peque e Xabi Lamas instaláronse no primeiro equipo. Agora teñen ás costas dúas tempadas a bo nivel na Preferente. Adrián Campero (Peque) suma 321 minutos en 5 partidos xogados (4 como titular). Xabi Lamas (fixo nas convocatorias) leva 458 minutos en 7 partidos (5 coma titular). Diante do Polígono volveu marcar un gol co Antela despois de dúas tempadas en branco.
Borja Carballo, o outro protagonista da última vitoria en Celanova, xoga menos: apenas 5 minutos en Melias en dúas convocatorias. Aarón Blanco, que como xuvenil debutou con Sabucedo aquel 2022, está nunha situación parecida: 19 minutos de xogo en tres convocatorias. Borja xogou 22 partidos como titular o ano pasado con Bruno Gómez no Monterrei; Aarón vén do Arnoia en Preferente ao que chegou despois de 20 partidos como titular no Maceda en Primeira. Non se encollen. Eles dous representan ben ese futuro que madura.

[embedded content]
Borja e Xabi, portagonistas naquel partido, lembran a última vitoria en Celanova.

Como Cole e Anxo, que regresaron á Moreira xusto despois daquel ascenso e xa contan moito para Bruno Gómez. Cole -ben como interior, ben como lateral, pola dereita ou pola esquerda- disputou 548 minutos (o cuarto do equipo) e anotou dous goles. Anxo ten continuidade nas convocatorias (5 de 7), saíu desde o banquiño en 4 partidos e suma 106 minutos. Con Bruno Gómez xogou a tempada pasada 26 partidos e anotou 9 goles.
O futuro madura no Antela. Vai dando pasos, curtos, pacientes, moi traballados, do banquiño ao campo; ocupando seguro e humilde, o seu lugar no once. Hai dous anos eran uns nenos que saían ao rescate dun Antela con urxencias. Hoxe, son cimento do Antela máis sólido que recorda A Moreira en anos.

Peque, Xabi, Breixo, Manu, David e Borja, aquel domingo de marzo en Celanova.

Saber máis · Descubre A Limia Porqueira 806 habitantes · 6 parroquias Coñecer o concello →