Máis de 500 mozos e mozas e doce formacións musicais reuniranse este sábado, 4 de xullo, na Cidade da Cultura para celebrar a novena edición do Festival de Bandas Infantís e Xuvenís de Galicia, nunha xornada que comezará ás 11:00 horas.
O evento ten como obxectivo poñer en valor as bandas populares galegas e converter o Gaiás nun espazo de encontro para amosar o talento das novas xeracións de músicos da nosa comunidade.
A programación dividirase en dúas quendas, ofrecendo un repertorio variado durante todo o día:
- Sesión de mañá (a partir das 11:00 h): Abrirá a xornada a Banda Escola Unión Musical de Tenorio, seguida pola Banda Xuvenil de Música de Silleda, a Banda Xuvenil de Tui, a Banda Infantil da Unión Musical de Meaño, a Banda Xuvenil da Escola de Música Unión de Guláns e a Banda Infantil de Xinzo.
- Sesión de tarde (a partir das 16:30 h): Actuarán a Banda Escola de Música de Portas, a Pequebanda da Escola de Música de Agolada, a Banda Infantil de Arzúa, a Banda Xuvenil da Agrupación Musical de Limia e a Minibanda de Vilalba.
O broche final desta edición poñerao a Banda Sinfónica Xuvenil de Galicia. Ás 19:00 horas, a formación ofrecerá un concerto que inclúe pezas como «Where Eagles Soar», «Breeze in the Forest» e «English Folk Song Suite», entre outras composicións destacadas.
