A Deputación de Ourense creará unha liña de axudas para concellos afectados por temporais

A Deputación de Ourense anunciou a creación dunha liña extraordinaria de axudas económicas para os concellos da provincia que se viron afectados pola sucesión de temporais recentes.

O presidente provincial, Luis Menor, explicou que o obxectivo principal desta medida é asegurar que as entidades locais poidan levar a cabo obras de emerxencia e restablecer canto antes as infraestruturas e servizos públicos básicos danados polas intensas precipitacións dos últimos vinte días.

«Somos plenamente conscientes da situación de vulnerabilidade na que se atopan moitos dos nosos concellos tras os temporais», afirmou Menor, engadindo que a institución debe «reaccionar con axilidade para que a falta de recursos técnicos ou económicos non sexa un obstáculo para a volta á normalidade».

Para a correcta avaliación dos danos e a determinaciòn dos fondos necesarios, o goberno provincial iniciará de inmediato, en colaboración cos rexedores das zonas máis afectadas, un inventario detallado dos estragos.

Mentres se define esta liña de axudas, o Servizo de Vías e Obras da Deputación xa está traballando a pleno rendemento na rede viaria provincial, que suma 1.850 quilómetros. Só durante a pasada semana, atendéronse 400 incidencias, das cales 52 foron comunicadas directamente polo 112 Galicia. A maioría destas intervencións estiveron relacionadas con cortes por asolagamentos, derrubamentos de noiros, presenza de pedras na estrada e a limpeza de cunetas e sumidoiros atascados.

Actualmente, o servizo está practicamente mobilizado na súa totalidade, con 60 persoas e 16 brigadas distribuídas en puntos estratéxicos. Estas bases operativas inclúen Xinzo de Limia, Verín, O Carballiño, Celanova, Ourense, Allariz-Maceda, Trives, Parada de Sil, Valdeorras, Viana-A Veiga e Bande. Ademais, hai seis vixiantes, tres encargados e seis equipos de retén dispoñibles para atender urxencias durante as 24 horas.

A Deputación reitera o seu chamamento á máxima precaución para os condutores e a un estrito respecto á sinalización provisional.