O Sindicato Labrego Galego (SLG-CCLL) levará a Bruxelas o rexeitamento do sector primario galego ao acordo UE-Mercosur, previsto para o venres 17 de xaneiro en Paraguai. A través da Comisión Europea e a Coordinadora Europea Via Campesina, o SLG busca frear un tratado que considera devastador para a agricultura familiar, ao favorecer aos intereses das transnacionais e do agronegocio.
O acordo facilitará a entrada sen aranceis de 99.000 toneladas anuais de carne de bovino e 100.000 de polo, o que xerará unha competencia desleal insustentable para as granxas galegas fronte a explotacións de maior tamaño en países como Uruguai ou Arxentina.
Ademais, Brais Álvarez, responsable de Acción Sindical do SLG, sinala riscos para a saúde pública e a seguridade alimentaria, debido á posible entrada de alimentos con 150 praguicidas prohibidos na UE pola súa perigosidade. O sindicato tamén alerta de que o tratado contradí os obxectivos climáticos da UE ao promover a deforestación da Amazonía para monocultivos.
O SLG esixe á Xunta, ao Goberno central e á UE unha oposición total ao acordo e a formación dunha minoría de bloqueo no Parlamento Europeo. A organización rexeita negociar cláusulas adicionais, xa que o tratado compromete o control cidadán sobre a procedencia e o prezo dos alimentos, converténdoos nunha mercadoría controlada por poucas empresas.
Fonte: www.diariodolimia.gal
