Axentes ambientais da Consellería de Medio Ambiente e Cambio Climático en Ourense investigan un vertido que tinguíu de vermello a auga da lagoa da Antela, en Sarreaus. A coloración foi detectada por un veciño o xoves, e este venres recolléronse mostras.
A principal hipótese sobre a orixe do problema apunta a unha vella embarcación afundida, empregada nunha antiga explotación de area pola xa desaparecida empresa Feldespatos Sarreaus. Créese que uns 5.000 litros de combustible poderían estarse filtrando dela á auga, contaminando o medio e o acuífero da Limia.
Esta embarcación, alcumada o “Prestige da Limia”, xa fora obxecto de denuncias previas por parte de veciños e o BNG.
Dado que a lagoa da Antela pertence á área de competencia da Confederación Hidrográfica Miño-Sil (CHMS), a Consellería de Medio Ambiente trasladará o caso a este organismo para que adopte as medidas necesarias. Xa en setembro, tras detectar un vertido de substancias iridiscentes na mesma zona, tamén se informou á CHMS.
O alcalde de Sarreaus, Gumersindo Lamas, tamén se desprazou ao lugar e notificou ao Seprona e outros organismos. Lamas sinalou que o Concello non ten competencia nin capacidade para retirar o barco, apuntando á responsabilidade de «Aliseda», a empresa que adquiriu os terreos da antiga areeira. Urxiu á Xunta e á CHMS a «arrimar o ombreiro» para solucionar o problema.
Durante o pleno municipal, o voceiro do BNG en Sarreaus, Agustín Martínez, preguntou ao alcalde polo vertido, chegando a pedir a súa dimisión por «deixadez», lembrando que xa alertaran da posibilidade de contaminación no verán. Lamas replicou que o Concello non é responsable, que xa se avisou á Confederación e que se volverá notificar a todos os organismos.
Fonte: www.laregion.es
