Vilar de Barrio pon en marcha unha iniciativa piloto, o Proxecto CARES

O subdelegado do Goberno en Ourense, Eladio Santos, destacou o compromiso do Goberno coa dinamización do rural e o aproveitamento dos montes para previr lumes na provincia. Esta declaración realizouse durante a presentación dos resultados do Proxecto CARES, que tivo lugar na Escola Politécnica Superior de Enxeñería da Universidade de Santiago de Compostela (USC), en Lugo. Acompañárono a subdelegada do Goberno en Lugo, Olimpia López.

O Proxecto CARES foi financiado con 1,6 millóns de euros pola Fundación Biodiversidade, dependente do Ministerio para a Transición Ecolóxica e o Reto Demográfico (MITECO), no marco do Plan de Recuperación, Transformación e Resiliencia (PRTR) e con fondos Next Generation. O obxectivo principal desta iniciativa é promover o aproveitamento da resina e da castaña no noroeste peninsular, abrangendo Galicia, Asturias e o norte de León.

Grazas ao papel da Subdelegación do Goberno en Ourense como axente dinamizador, púxose en marcha un proxecto piloto en Vilar de Barrio. Este proxecto busca impulsar a produción conxunta e facilitar o acceso á tecnoloxía á base produtora de Ourense. As zonas seleccionadas para a validación dos modelos técnico-económicos son as comunidades de montes de Parada e Rebordechao. O proxecto comezará o vindeiro ano coa resinación de 4.000 piñeiros e a xeración de emprego.

Eladio Santos agradeceu a implicación de todos os axentes implicados, calificando a experiencia como unha que “revive o medio rural da provincia”. Subliñou o gran interese xerado entre a poboación por dedicarse á produtividade do monte, reflectido no curso formativo de Vilar de Barrio, que contou con máis de 50 alumnos e alumnas.

O subdelegado remarcou que o Goberno impulsa esta iniciativa porque aposta pola bioeconomía circular como motor de futuro, ofrecendo alternativas económicas que respectan o patrimonio natural.

O consorcio responsable do Proxecto CARES está composto pola Fundación CETEMAS (coordinadora), a Fundación Cesefor, o grupo de investigación PROePLA da USC, PEFC España e a asociación de propietarios Juntas de Montes de Asturias (JUMA).

Saber máis · Descubre A Limia Vilar de Barrio 1.178 habitantes · 9 parroquias Coñecer o concello →