O casco histórico de Ribadavia acolle do 5 ao 8 de decembro o evento «Artesanía, Saber e Sabor», impulsado pola Xunta de Galicia. Esta segunda edición, que segue ao éxito da anterior, servirá como punto de partida para o proxecto «Vilas Vivas», destinado a revitalizar baixos comerciais en desuso.
Abrirán nove espazos comerciais, tres deles de xeito permanente: Colmado de Sabores, Pura Vila e A Tafona do Camiño. Os restantes acollerán propostas artesanais durante o evento e o Nadal, en colaboración co comercio local.
Participarán 14 obradoiros da marca Artesanía de Galicia, distribuídos na Igrexa da Madalena e na rúa Banda da Lira. Haberá obradoiros gratuítos e cursos especializados con inscrición previa.
A Praza Maior acollerá Artesanía Alimentaria con 32 produtores, catas de viños da D.O. Ribeiro e unha área infantil. A rúa Yáñez terá unha zona de degustación. A animación musical correrá a cargo de diferentes grupos de pasarrúas. O comercio local terá espazo na Alameda.
