Alumnos do curso “Restauración de Ecosistemas” organizado pola UNED visitaron o Centro de Interpretación da Lagoa de Antela en Sandiás

O sábado 22 de novembro, vinte alumnos da UNED do Porriño, que cursan “La Restauración Ecológica”, visitaron o Centro de Interpretación da Lagoa de Antela. A visita formaba parte dun programa con sete saídas de campo para estudar casos de restauración de ecosistemas.

Guiados pola Sociedade Galega de Historia Natural, analizaron casos de restauración na Lagoa de Antela e nas Areeiras de Sandiás. No Centro de Interpretación, visionaron un audiovisual sobre a Lagoa, examinaron cartografía histórica e proxectos de desaugamento. Tamén se trataron temas como a desecación da lagoa, a concentración parcelaria, lendas e etnografía.

Ademais, exemplificáronse proxectos de restauración como o Humidal Antonio Vilariño, a Veiga de Gomareite, a Poza dos Arieiros, o proxecto in-visible pollut, o Life Rexenera Limia e a Senda das Cegoñas.