O Concello de Salceda de Caselas recoñecerá a Nieves Castro (Xinzo, Ponteareas, 1954) como Salcedense Distinguida. Nieves foi a primeira muller condutora na empresa Raúl, rompendo prexuízos nun sector tradicionalmente masculino.
Veciña da parroquia de A Picoña, onde formou a súa familia, Nieves superou as dificultades dunha época marcada polo machismo e o clasismo, traballando dende nova para axudar na casa. Tras diversas formacións, incluídos os carnés de camión e autobús, entrou en 1990 na empresa Raul e posteriormente traballou 21 anos en Vitrasa, en Vigo.
Ademais da súa carreira profesional, Nieves involucrouse na defensa dos dereitos colectivos, participando na Anpa e na asociación veciñal Carballeira. Un logro importante foi conseguir que o autobús escolar chegase a Picoña.
Xunto a Nieves Castro, tamén serán recoñecidos Luís González e Tomás Rodríguez.
