12 feb 2025. Actualizado ás 05:00 h.
A CIG esixiu á Dirección Xeral da Consellería de Xustiza o reforzo urxente de persoal no Xulgado de Xinzo de Limia. Segundo denuncia o sindicato, este órgano xudicial atópase nunha situación de colapso debido á sobrecarga de traballo e á falta de traballadores, o que está a afectar ao correcto funcionamento do servizo.
Desde o sector de Xustiza da CIG-Administración alertan de que esta situación foi reiteradamente trasladada tanto ao Tribunal Superior de Xustiza de Galicia (TSXG) como á propia Consellería, sen que ata o momento se adoptase ningunha solución efectiva.
No seu escrito, a CIG fai referencia á solicitude de nomeamento de reforzo que o letrado da Administración de Xustiza do xulgado remitiu o pasado 24 de xaneiro, xustificada pola elevada carga de traballo. Entre os principais problemas sinalados, destacan as baixas no cadro de auxilio xudicial, que no seu momento afectaron simultaneamente aos dous funcionarios desta categoría, o que xerou importantes atrasos na tramitación de procedementos.
Archivado en: Xinzo de Limia, TSXG
