Sandiás presenta un programa de Nadal con seis temáticas propias e foco na tradición

O Concello de Sandiás deu a coñecer o seu programa de Nadal, que se estruturará arredor de seis temáticas propias destas festas. A presentación estivo a cargo do alcalde, Felipe Traveso, acompañado polos concelleiros de Cultura, Pepe Gándara, e de Xustiza Social e Participación Cidadá, Pilar Cabrera.

A ambientación e decoración do concello revivirá elementos simbólicos como a casa consistorial, a casa, o tren, coellos, cervos, a ponte, o pescador e a emblemática torre do Castro. A iluminación tamén será protagonista, destacando a “bola do mundo” e diversas árbores. Esta decoración estenderase ás 18 aldeas do municipio con pequenos detalles que buscan “acender a maxia e a ilusión dos veciños”. O material empregado será de baixo custo e reciclado, coa contribución das brigadas municipais e a colaboración de veciños e veciñas.

O agasallo municipal deste ano será un calendario que pon en valor o patrimonio relacionado coa arquitectura da auga, mencionando especificamente o pozo de mina na aldea de Piñeira de Arcos e a fonte da desaparecida aldea da Uceira. Tamén se animará á decoración dos fogares.

Para os máis pequenos, a xornada do venres 19 de decembro, de 17:30 a 20:00 h no Salón de Actos e Local Social do Concello, estará protagonizada polos nenos e nenas do Punto de Atención á Infancia (PAI) xunto ás súas familias, coa colaboración da AMPA e do Concello. Realizaranse manualidades, haberá sorpresas con panxoliñas preparadas polos cativos e contará coa presenza do Apalpador e o teatro de monicreques “O Apalpador e a nena sen medo” da Xanela do Maxín, aberto á participación de toda a veciñanza.

A música terá un papel destacado. O sábado 20 de decembro, ás 19:00 h na Casa de Cultura do Concello de Sandiás, terá lugar o IV Concerto de Música co cantautor Emilio Rúa e o poeta Xosé Carlos Caneiro, baixo o título “Cánticos de Luz e Nadal”.

Dentro da recuperación e mantemento das tradicións, o luns 5 de xaneiro pola tarde realizarase a Visita dos Reis Meigos aos máis cativos. Ademais, por cuarto ano consecutivo, o domingo 4 de xaneiro pola mañá celebrarase o Cantar os Reis, en colaboración co CDR O Viso, o PAI, o CEIP de Sandiás e veciños que desexen participar. A visita a Pazolandia para os máis pequenos está programada para o luns 29 de decembro.

Finalmente, destaca a VII Campaña de Solidariedade, centrada na recollida de alimentos. Iniciada o 14 de novembro, rematará o 18 de decembro. Os alimentos recadados serán doados ao Banco de Alimentos de Ourense.

Saber máis · Descubre A Limia Sandiás 1.086 habitantes · 3 parroquias Coñecer o concello →