O Concello de Xinzo de Limia e a Asociación de Inmigrantes Caminando Juntos puxeron en marcha unha campaña de recollida de medicamentos e material de primeira necesidade para axudar á poboación afectada polo recente terremoto en Venezuela.
A iniciativa, que conta co apoio da Federación de Venezolanos en Galicia (FEVEGA), desenvolverase durante os días 29 e 30 de xuño, e o mércores 1 de xullo. O obxectivo é enviar a axuda humanitaria recollida o antes posible ás zonas máis afectadas.
Para facilitar as doazóns, habilitáronse varios puntos de entrega:
- Mañás: Servizos Sociais, na primeira planta do Concello (preguntar por Guillermo) e na Casa da Cultura.
- Tardes (de 16:00 a 20:00 horas): Establecemento Ágora.
A organización solicita prioritariamente os seguintes produtos para cubrir as necesidades básicas dos damnificados:
- Medicamentos básicos: analxésicos, antiinflamatorios (paracetamol ou ibuprofeno), antialérxicos, antibióticos e inhaladores para o asma.
- Pediatría: xarabes analxésicos e antibióticos infantís, ademais de sales de rehidratación oral.
- Material de curas: gasas, vendas, esparadrapo, alcohol, auga osixenada e iodo.
- Hixiene e insumos: cueiros (infantís e de adultos), toalliñas húmidas, termómetros e glucómetros.
Para calquera dúbida ou información adicional sobre esta cadea de solidariedade, as persoas interesadas poden contactar coa asociación a través do teléfono 605 583 657.
