O Concello de Xinzo de Limia e a directiva do Antela F.C. ultiman os preparativos para homenaxear ao equipo este venres, 26 de xuño, tras acadar o histórico ascenso á Terceira Federación.
A celebración comezará ás 21:00 horas cunha gran rúa que partirá desde a Casa do Concello. O autobús, no que viaxarán os xogadores, o corpo técnico e a directiva, percorrerá as principais arterias da vila para festexar este éxito deportivo coa veciñanza.
O itinerario previsto para a comitiva é o seguinte:
- Saída desde o Concello cara ás rúas Curros Enríquez, Cruceiro e Marcelo Macías.
- Percorrido pola Avenida de Ourense ata a rotonda do Pombal.
- Regreso pola mesma avenida cara á Praza Maior.
- Continuación polas avenidas de Madrid e Portugal, a rúa Rosalía de Castro e a rúa Dous de Maio.
- Finalización do traxecto na explanada do Toural.
O acto central terá lugar a partir das 21:45 horas na explanada do Toural. A Orquestra Pontevedra será a encargada de amenizar a chegada dos futbolistas, que subirán ao palco da música para recibir o recoñecemento oficial das autoridades locais.
Esta xornada servirá como colofón a unha tempada brillante para o club limiano, permitindo que a afección comparta cos seus xogadores un dos fitos máis importantes do fútbol local nos últimos anos.
