O Parlamento de Galicia aprobou a proposición non de lei do Grupo Popular a través da que se insta ao Goberno central, con motivo do custo do Proxecto de mellora para o aproveitamento do regadío, a que promova un cambio lexislativo que permita non repercutir o IVE non deducible aos regantes da comarca da Limia e, no caso de que isto non fora posible, asumir a financiación do 80 por cento de dito IVE, ademais de que revise o esquema de financiamento do convenio para evitar que os regantes teñan que avalar o montante total do seu investimento.
Por último, solicitouse á Xunta de Galicia e a Deputación de Ourense a que asuman a financiación do 20 por cento do IVE da actuación, no caso de que non se acade o cambio lexislativo que permita a súa non repercusión.
A deputada popular, Cristina Campero, lembrou que no ano 2021, no marco do Plan para mellora da eficiencia e sostibilidade en regadíos”, incluído no Plan de recuperación, transformación e resiliencia da economía española, preseleccionouse o Proxecto de mellora para o aproveitamento en regadío das 40 captacións de augas subterráneas-A Limia.
Co fin de axudar aos regantes no acceso a este proxecto de mellora, a Xunta asinou coas comunidades de regantes de San Salvador de Sabucedo, Lamas-Granade, Corno do Monte e Alta Limia a construción de 40 pozos, ademais dos equipos e instalacións necesarias para o seu correcto funcionamento. O Goberno galego investiu 4 millóns de euros, ao que sumou outros 2,5 millóns de euros para a instalación de grupos de bombeo.
