A asociación cultural Civitas Limicorum de Xinzo de Limia participou esta fin de semana no 40º aniversario da festa «Astures y Romanos», celebrada en Astorga.
Un grupo de recreadores da nosa localidade desprazouse ata a cidade leonesa para celebrar este evento, que semella moito á nosa Festa do Esquecemento. Ambas as festas teñen en común que son os propios veciños, organizados en asociacións, os que as sacan adiante co seu traballo altruísta.
Na viaxe participaron:
- Ana Lozano, tesoureira da asociación.
- Carlos González, secretario.
Ambos asistiron á recepción oficial organizada polo Concello de Astorga e a asociación anfitrioa para dar a benvida ás delegacións chegadas doutros lugares. Con esta visita, a entidade de Xinzo reafirma o seu compromiso de seguir colaborando con Astorga para promover a historia e o patrimonio común.
